وتار پردێ بوو بە کۆڕێ..

پردێ بوو بە کۆڕێ..

 

ئەو تێکشکانەی ئەمڕۆی ئەو هێزانە لەپردێ لەسەر دەستی پێشمەرگە کە تێکشکانێکی نەوعی بوو لەتێکشکانی سەربازیدا، نیشانیدان کوردستان بەخۆڕاگری هێزی پێشمەرگە خاوەنی ئیرادەیەکی بەهێزە و هەروا بەئاسانی ئەو ئیرادەیە تێک ناشکێ و لەبن نایەت.

 

 

 

 

مێژوو خۆی دووبارە دەکاتەوە

ئەوە داستانە پڕ لە قارەمانیەتییەی ئەمڕۆ کە لە پردێ لەسەر دەستی پێشمەرگە قارەمانەکان تۆمارکرا، هیچی کەمتر نەبوو لەو داستانە گەورەیەی کە لەساڵی ١٩٩١ لە کۆڕێ تۆمارکرا، ئەو سەرکەوتنەی پێشمەرگە سەرکەوتنێکی هێندە گەورە و کاریگەربوو، ورە و توانای سوپایی عێراق و حەشدی شەعبی بەجارێک داتەپاند، واشی کرد لەو یەک دوو ڕۆژەی داهاتوودا ڕای هاوپەیمانان و وڵاتان وردە وردە بەرامبەر بەو زوڵمەی کەحکومەتی بەغدا بەهاوکاری و هەماهەنگی ئێران و تورکیا بەرامبەر بە کوردستان ئەنجامی دەدات گۆڕانی بەسەر دابێت.

ئەو مقاوەمە و بەرگرییەی ئەمڕۆ لە پردێ کرا، دەبوایە لە خورماتوو بکرابایە، ئەو وانە کەمەرشکێنەی ئەمڕۆ کەبە حەشدی شەعبی و سوپای پاسدارانی ئێران درا لە ڕووبەڕووبوونەوە و تێکشکاندنیان، دەبوایە لەقەرەتەپە و هێڵی پێشەوەی سەنگەرەکان بکرابایە، بەڵام کە نەکرا بەداخەوە بەهۆی چەند هۆکارێکەوە بوو، یەک لەوانە، خیانەتی باڵێکی ناو یەکێتی کە وایکرد بەڕێگەی ڕێککەوتنێکی شومەوە کەرکووک بە ئاسانی بدرێتە دەست حەشدی شەعبی، ئەوە هۆکاری سەرەکی کەوتنی کەرکووک بوو، بەڵام جگە لەوە هۆکاری دیکەش هەبوون، لەوانە ئەو لاباڵەی یەکێتی کەپیلانی خیانەتەکەیان جێبەجێکرد لەحاڵەتێکدا ئەگەر هێزەکانی دیکەی پێشمەرگە کە مابوونەوە لەسەنگەرەکانیان ڕوبەڕووی سوپای عیراقی و حەشد ببانەوە، لە پشتەوە شەڕی براکوژییان لەگەڵیاندا هەڵدەگیرساند، ئەوکات ئەوەی هەشمان بوو لەدەستمان دەدا.

خۆ ئەگەر ئەو خیانەتە لە بنەڕەتەوە نەکرابایە و ئەو مقاوەمەی ئەمڕۆی پردێ لە سەنگەرەکانی پێشووی کەرکووک بکرابایە، ئەوا بە دڵنیایی ئێستا هەڵوێست و ڕای گشتی جیهان بە پێچەوانە دەبوو، چونکە لە ئێستادا ڕوو لە هەر لایەک دەکەیت و بەهەر ووڵاتێک دەلێیت، پێت دەڵێن، کەرکووک و هەموو ئەو خاکەی لەدەست دراوە بە رێککەوتن بووە، ئەوان چاوو لەوە ناکەن کە چەند کەسانێکی خائین لە ناوخۆدا خیانەتیان کردووە لە خوێنی شەهیدان و تەواوی قوربانیدانی گەلی کوردستان.

ئێستاش بەهۆی ئەو مقاوەمەت و خۆڕاگرییەی هێزی پێشمەرگەی کوردستان لەپردێ بەرامبەر بەحەشدی شەعبی و سوپای عیراقی کەپشت بەستن بە سوپای پاسدارانی ئێران، ڕای گشتی جیهان گۆڕان بەخۆیەوە دەبینێ، چونکە ئەو تێکشکانەی ئەمڕۆی ئەو هێزانە لەپردێ لەسەر دەستی پێشمەرگە کە تێکشکانێکی نەوعی بوو لەتێکشکانی سەربازیدا، نیشانیدان کوردستان بەخۆڕاگری هێزی پێشمەرگە خاوەنی ئیرادەیەکی بەهێزە و هەروا بەئاسانی ئەو ئیرادەیە تێک ناشکێ و لەبن نایەت.

 

بابەتی زیاتر