کوردستان " هەر هاووڵاتییەكی كورد بگەڕێتەوە خورماتوو ژیانی پارێزراو نابێت "

" هەر هاووڵاتییەكی كورد بگەڕێتەوە خورماتوو ژیانی پارێزراو نابێت "

 

بەرپرسێک: "حەشدی شەعبی دیسان هێرشیان کردە سەر گەڕەکی کۆماریی خورماتوو"

 

  

بەرپرسی لێژنەی ناوچەی خورماتووی پارتی دیموكراتی كوردستان ڕای دەگەیەنێت، بەهۆی ئەوەی میلیشیاكانی حەشدی شەعبی خورماتوویان داگیر كردووە, هەر هاووڵاتییەكی كورد بگەڕێتەوە بۆ خورماتوو, ژیانی پارێزراو نابێت.

ئەمڕۆ یەكشەممە 14/1/2018، ئەرسەلان عەلی، بەرپرسی لێژنەی ناوچەی خورماتووی پارتی دیموکراتی کوردستان، بە رۆژنامەی باسنیوزی ڕاگەیاند: "تاكوو میلیشیاكانی حەشدی شەعبی لە خورماتوو بمێننەوە و هێزەكانی ئاسایش و پێشمەرگە نەگەڕێتەوە بۆ خورماتوو، ژیانی هیچ كوردێك پارێزراو نابێت کە بگەڕێتەوە بۆ شرەکەیان، چونكە میلیشیاكان بەتەواوەتی شارەكەیان داگیر كردووە و هەرچییەكیان بوێت بە ئارەزووی خۆیان ئەنجامی دەدەن".

ئەو بەرپەرسەی پارتی، ئاماژەی بۆ ئەوەش كرد: "چەند ڕۆژێكە هێزێكی بەرپەرچدانەوەی خێرای سەر بە حكوومەتی عێراق هاتوونەتە ناو شاری خورماتوو و ئەو هێزەش سەرلەبەیانیی ئەمڕۆ یەكشەممە بە بیانووی پشكنینی ماڵان و ڕاماڵینی شارەكە لە چەك هەڵیانكوتاوەتە سەر گەڕەكی كۆماریی كوردنشین".

ڕوونیشی كردەوە، لەبەر ئەوەی هاووڵاتییانی كورد ئەو گەڕەكەش ئاوارە بوونە و ئەو هێزەش دەرگای زۆربەی ماڵەكانیان شكاندووە و چوونەتە نێو ماڵەكانەوە.

ژمارەیەك هاووڵاتیی خورماتوو لە تۆڕە كۆمەڵایەتییەكان داوا لە هاووڵاتییانی ئاوارەی خورماتوو دەكەن بگەڕێنەوە بۆ شارەكە، بەڵام بەرپرسانی حزبی لە خورماتوو، ئاماژە بۆ ئەوە دەكەن كە تاكوو دۆخی خورماتوو ئاسایی نەبێتەوە، هاووڵاتییان نەگەڕێنەوە بۆ شارەكە".

 ڕۆژی 16ی ئۆکتۆبەری ڕابردوو، حەشدی شەعبی و چەند میلیشیایەکی دیکە، بەڕێککەوتن لەگەڵ گرووپێکی خیانەتکار، پەلاماری کەرکووک و خورماتوو و خانەقینیان دا و دەستیان بە سەردا گرت و سەدان ھاووڵاتیی کوردیان شەھید و بریندار کرد و نزیکەی 200 ھەزار کەسیش لەو سنوورانە ئاوارە بوون.

ڕۆژی 18ی ئۆکتۆبەری ڕابردوو، کۆسرەت ڕەسول عەلی، جێگری سکترتێری گشتی یەکێتی لە پەیامێکدا ڕای گەیاند: "ئۆباڵی کارەساتەکانی کەرکووک و خورماتوو لە ئەستۆی کاڵفامەکانی ناو یەکێتی دایە".

ڕۆژی 27/12/2017 جەعفەر شێخ مستەفا، فەرماندەی هێزەکانی 70ی پێشمەرگە و ئەندامی مەکتەبی سیاسیی یەکێتیی نیشتمانیی کوردستان بە ڕاشکاوی ڕای گەیاند: ”هۆکاری 16ی ئۆکتۆبەر ڕیفراندۆم نەبوو، بەڵکوو خیانەتی گرووپێکی نێو یەکێتی بوو“. باسیشی لەوە کرد کە ئەگەر مام جەلال لە ژیان بووایە، ئەو گرووپەی نێو یەکێتی وەک خیانەتکار سزا دەدا.

 

بابەتی زیاتر