سووریا ئەمەریكا فڕۆكەیەكی بێ فڕۆكەوانی ئێرانی لە سووریا خستە خوارەوە

ئەمەریكا فڕۆكەیەكی بێ فڕۆكەوانی ئێرانی لە سووریا خستە خوارەوە

 

سوپای ئەمەریكا رایگەیاند: فڕۆكەیەكی بێ فڕۆكەوان بە ناوی "شاهد 129" کە لە ئێران دروستكراوە لە یەكەمین كاتژمێرەكانی رۆژی سێشەممە 20ی حوزەیران لەلایەن فڕۆكەیەكی "ئیف15"ی ئەمەریكا كراوەتە ئامانج و لە باكووری رۆژهەڵاتی پێگەی تەنەفی سووریا، لە نزیكی سنووری ئەردەن كەوتۆتە خوارەوە.

بە پێی راپۆرتی ناوەندی هەواڵنێری فەڕەنسا، لە راگەیەندراوێكدا هێزەكانی هاوپەیمانی بە سەرۆكایەتی ئەمەریكا هاتووە كە ئەم فڕۆكە بێفڕۆكەوانە بە شێوەی هێرشكردن بەرەو ئەو ناوچە هاتووە كە تێیدا هێزەكانی هاوپەیمانی بۆ خۆئامادەكردن بەرامبەر گروپەكانی حكومەتی ئیسلامی (داعش) خەریكی مەشق و راهێنانی سەربازی بوون.

بەرپرسێكی سەربازی ئەمەریكا گوتی: ئەم فڕۆكە بێفڕۆكەوانە بە خێراییەكی زۆر بەرەوە ئێمە دەهات. بۆیە لەلایەن هێزەكانی هاوپەیمانانەوە كرایە ئامانج و خرایە خوارەوە.

بە پێی راپۆرتی رۆیتەرز، سوپای ئەمەریكا ئاماژەی بەوە داوە روون نییە كۆنتڕۆڵی فڕۆكەكە لەدەست كێ یان كام گروپدا بووە.

ئەمە دووەم جارە لەم مانگەدا ئەمەریكا دەڵێت فڕۆكەی بێفڕۆكەوانی لە نزیكی ناوچەی تەنەف كردۆتە ئامانج.

 

بابەتی زیاتر