کوردستان حەشدی شەعبی خانووی هاووڵاتییەکی کورد دەتەقێننەوە

 

گرتەی ڤیدیۆیی تەقاندنەوەی خانووی هاووڵاتییەکی کورد لەلایەن حەشدی شەعبی

 

ژمارەیەک چەکداری میلیشیاکانی حەشدی شەعبی خانووی هاووڵاتییەکی کورد لە خورماتوو دەتەقێننەوە گرتە ڤیدیۆییەکەی لە تۆڕە کۆمەڵایەتییەکان بڵاو دەکەنەوە 

هەروەک لە گرتە ڤیدیۆییەکەدا دیارە، ئەو چەکدارانە خانووەکەیان بۆمبڕێژ کردووە و دوای دوور کەوتنەوە لێی، دەیتەقێننەوە و دەیڕووخێنن.

دوای داگیرکردنی شاری خورماتوو لەلایەن میلیشیاکانەوە بە هاوکاریی گرووپێکی یەکێتیی نیشتمانیی کوردستان، چەکدارانی حەشدی شەعبی خانووی دەیان هاووڵاتیی کوردیان تەقاندووەتەوە و سووتاندووە، جگەلە کوشتن و بێ سەروشوێنکردنی سەدان هاووڵاتی.

بەرەبەیانی رۆژی دووشەممە 16/10/2017، سوپای عێراق، میلیشیاکانی حەشدی شەعبی و حزبوڵڵای لوبنانی بە سەرپەرشتیی و بەشداریی سوپای پاسدارانی ئێران هێرشیان کردە سەر خورماتوو، کەرکووک و ناوچە کوردستانییەکانی ئەو سنوورە و داگیریان کردن و بەپێی راپۆرتی نەتەوە یەکگرتووەکان، بەهۆی ئەو داگیرکارییەوە نزیکەی 200 هەزار هاووڵاتیی ئاوارەی هەولێر و شارەکانی دیکەی کوردستان بوون.

رۆژی چوارشەممە 18/10/2017، کۆسرەت رەسوڵ، جێگری سکرتێری گشتیی یەکێتی لە پەیامێکدا رایگەیاند، کە چەند “کاڵفام”ێکی ناو حزبەکەی ئەو پیلانەیان لە دژی گەلی کوردستان جێبەجێ کرد و رایگەیاند، “ئۆباڵی کارەساتەکانی کەرکوک و ھەموو زیانە گیانی و مادی و مەعنەویەکانی تری گەلەکەمان ئەکەوێتە ئەستۆی ئەو کاڵفامانەی ناو یەکێتی”.

حەشدی شەعبی لە نزیکەی 67 میلیشیای شیعەمەزهەبی عێراقی پێک دێت. بە فەتوای ئایەتوڵڵا عەلی سیستانی، مەرجەعی باڵای شیعەکانی عێراق دوای هەرەس پێهێنانی سوپای عێراق لە مانگی حوزەیرانی2014 لەلایەن چەکدارانی رێکخراوی تیرۆریستی داعش، دروست بووە.

 

بابەتی زیاتر