سووریا زیادبوونی ئەگەری شەڕی سەربازی نێوان ئێران و ئەمەریكا

زیادبوونی ئەگەری شەڕی سەربازی نێوان ئێران و ئەمەریكا

 

ئاوابوونی "داعش" لە سووریا

هاوكات لەگەڵ پاشەكشەی ئارامی داعش لە سووریا، دوژمنەكانی لە پێشبڕكێی دەستبەسەرداگرتنی ئەو ناوچانەی پێشتر داعشی لێبوو، رووبەرووی یەكتر بوونەتەوە.
ئەمەریكا بە پشتیوانی و پڕچەككردنی هێزەكانی دیموكراتیكی سووریا بڕیاریداوە شاری رەققە پایتەختی داعش ئازادبكات و هێزەكانی ئەسەدیش بە پشتیوانی ئەو لایەنانەی پشتگیری دەكەن، بە تایبەتی كۆماری ئیسلامی ئێران، بە جووڵەیان بەرەوە رۆژهەڵاتی سووریا بە نیازن خۆیان بە سنوورەكانی عێراق بگەیەنن. ئەمەریكا ئەم جووڵە و چالاكییە دژ بە بەرنامە و پلانەكانی خۆی دەزانێت، كاردانەوەی بەرامبەری هەبووە.

 

كاردانەوەی كردەیی ئەمەریكا
هەر لەم بارەوە، ئێوارەی یەكشەممە 23ی حوزەیران فڕۆكەیەكی ئێف-18 (سوپەر هۆرێنت)ی ئەمەریكایی فڕۆكەیەكی جۆری سۆخۆ-22ی سووریای لە نزیكی شاری ئەلتەبقە لە باشووری رۆژئاوای رەققە خستە خوارەوە. سێ رۆژ دوای ئەوەی فڕۆكەیەكی بێ فڕۆكەوانی ئێرانی لە ئەلتەنەف، لە باشووری سووریا لە نزیكی سنووری عێراق و ئەردەن، بووبە ئامانجی فڕۆكەیەكی شەڕكەری ئێف-15 (ئیگڵ)ی ئەمەریكایی.

ئەمەریكا لە خاڵی ستراتژیكی ئەلتەنەف پێگەیەكی سەربازیی دامەزراندووە كە بە گوتەی جێف دەیڤیس، وتەبێژی پێنتاگۆن، "راوێژكارانی سەربازی ئەمەریكایی" راهێنان بە گروپە میلیشاكانی دژی داعش دەكەن. راپۆرتی هەندێك لە میدیاكانی رۆژئاوایی باس لەوە دەكات بەشێك لە سەربازانی بەریتانیایی، رەنگە لە یەكەكانی تایبەنی ئێس ئا ئێس و هەروەها جەیشی موغایر ئەلسەورە (سوپایەكی كۆماندۆی شۆڕشگێڕ، ناوە پێشووەكەی سوپای نوێی سووریا) لەم پێگەیە جێگیر كراون.

پێشتر، رۆژی پێجشەممە 13ی حوزەیران، فڕۆكەیەكی بێفڕۆكەوانی لە نزیك پێگەی ناوبراو خستە خوارەوە، ئەو جۆرەی وتەبێژی پێنتاگۆن جەختی كردەوە، هەردوو فڕۆكە بێفڕۆكەوانەكە ئێران درووستی كردبوون، چەكداربوون و هەڕەشەیەك بوون بۆیە خرانە خوارەوە.

 

سوڕانی سیاسەتی ترامپ
دۆناڵد ترامپ، سەرۆككۆماری ئەمەریكا، لە میانەی بانگەشەی هەڵبژاردنەكان بەڵێنی بە دەنگدەرە ئەمەریكاییەكان دا ناهێڵێت وڵاتەكەی راستەوخۆ بەشداری شەڕی سووریا بكات. بەڵام ئێستا ئەو ئەكتەرێكی سەرەكی شەڕی سووریا و شەڕە وێرانكارە نوێنەرایەتییەكانە لە ناوچەكە كە دەتوانێت ببێت هۆكاری شەڕی داهاتوو لە رۆژهەڵاتی ناوەڕاستدا.

هێرشی فڕۆكە شەڕكەرەكانی ئەمەریكا بۆ سۆخۆیەكی سووری، مەترسی هەڵكشانی شەڕی سەربازی و ئاڵۆزی ئەكتەرەكان و هاوپەیمانانی لە شەڕی سووریا پیشاندا. ئەمەریكا ئەم هێرشەی بە پشتیوانی لە "هێزەكانی دیموكراتیكی سووریا" ئەنجامدا كە خۆی پێكهاتەیەكە لە كورد، سوننە و مەسیحییە عەرەب و توركمانە سووریەكانە. سەرۆكی ئەم هاوپەیمانییە "یەكیینەكانی پاراستنی گەلی كوردستان" ناسراو بە "یەپەگە"یە و فڕۆكەكانی سووریا شوێنی ئەم هاوپەیمانییەی لە نزیكی شاری ئەلتەبەقە لە نزیكی بەنداوی ستراتژیكی ئەسەد كردبووە ئامانج، ئەو ناوچەی چەندین ساڵ لە ژێر كۆنتڕڵی داعش بوو و لە ماوەی رابردوودا لەلایەن هێزەكانی دیموكراتیكی سووریاوە ئازاد كرا.

لە ساڵی رابردوودا هێزەكانی دیموكراتیكی سووریا و یەكینەكانی پارستنی گەلی خۆیان لە شەڕی هێزەكانی ئەسەد پاراستووە بەڵام بە بەربڵاوكردنی چالاكییەكانی هێزەكانی لایەنگری ئەسەد لە رۆژهەڵات و باشووری رۆژهەڵاتی سووریا، شەڕی نێوان ئەم هێزانە لەگەڵ ئەو هێزانەی ئەمەریكا پشتویانی لێدەكات، سەد لە سەدە.

پێنتاگۆن بە رێكخستن، چەكداركردن و راهێنانی هێزەكانی دیموكراتیكی سووریا لە ساڵی رابردوودا، بڕیاریداوە ئەم هێزانە بۆ شەڕی كۆتایی لە رەققە ئامادە بكات.

بە پێی ئەم پرۆگرامەی ئەمەریكا، فەرماندەیی ناوەندی (سێنت كام) لە راگەیەندراوێكدا رۆژی 19 حوزەیران دوای خستنە خوارەوەی سۆخۆی 22 سووریا رایگەیاند: هاوپەیمانی [نێوەدەوڵەتی بە سەرۆكایەتی ئەمەریكا دژی داعش] بێ نیازی شەڕ لەگەڵ هێزەكانی رژێمی سووریا، رووسیا و یان هێزەکانی سەر بە ئەسەد نییە بەڵام بێگومان بەرامبەر هەر جۆرە مەترسی و هەڕەشەیەك بەرامبەر بە هاوپەیمانی و هێزەكانی دەبینەوە.

 

ئامانجە دژەكان، هەڵكشانی كێشەكان
لە كاتی بەدەسەڵات گەیشتنی دۆناڵد ترامپەوە وەكوو سەرۆككۆماری ئەمەریكا، لانیكەم پێنج گورزی سەربازی لە رژێمی بەشار ئەسەد و هاوپەیمانییەكانی وەشاندووە و زۆربەیان بە ئامانجی پاراستن و پشتیوانی لە راوێژكارانی ئەمەریكا و گروپەكانی سەر بە ئەمەریكا ئەنجام دراون.
بە سەرەنجان بە شەڕی سووریا و ئەوەی كە هێزە جیاوازە سەربازیی و میلیشیاكان بە ئامانجە جیاوازەكانیانەوە سەرەنجیان بۆ لای رۆژهەڵات و باشووری رۆژهەڵاتی راكێشراوە تا پاشەكشە بە داعش لە ناوچە ستراتژیكەكان بكەن، هەروەها كە ئاماژەی پێدرا، ئەگەری زۆر شەڕی نێوان ئەم گروپانە رووبدات، تەنانەت ئەگەر پێنتاگۆن مەیلی بۆ شەڕێكی راستەوخۆ لەگەڵ هێزەكانی ئەسەد یان هێزەكانی سەر بە ئێران و رووسیا نەبێت.
لەمبارەوە، بە پێی راپۆرتی رۆژنامەی واشینگتۆن پۆست، بەرپرسانی كۆشكی سپی داوایان لە پێناگۆن كردووە كە پێگە و خاڵی دیدەبانی لە رۆژهەڵاتی و باشووری رۆژهەڵاتی سووریا دابمەزرێنێت. بە ئامانجی چاودێری چالاكی و بەرگری لە بوونی سەربازی هێزەكانی ئەسەد و كۆماری ئیسلامی لەم ناوچەیە وێناكراوە.
بە پێی بڕوای بەرپرسانی سەربازی ئەمەریكا، داعشەكان خەریكی پاشەكشە بۆ ئەو ناوچانەن دانیشتوانیان كەمە و دەتوانن دوای كۆكردنەوە گروپە جیاوازەكان و رێكخستنەوەیان هێرشی تیرۆریستی لە وڵاتە رۆژئاواییەكان ئەنجام بدەن.
هەروەها كۆنتڕۆڵكردنی ئەم ناوچە لەلایەن هێزەكانی ئەسەدەوە دەتوانێت چارەسەری سیاسی بۆ قەیرانی سووریا ئاڵۆزتر بكات بە لەبەرچاوگرتنی ئەوەی ئەمەریكاییەكان رایان وایە بۆ سەقامگیربوونەوەی سووریا پێویستە دەسەڵاتی ئەسەد بەرەبەرە كەم بكرێتەوە و لە كۆتاییدا لە بازنەی سیاسی سووریا بكرێتەوە دەرەوە.
بە لەبەرچاوگرتنی ئەو شتانەی باس كرا ناردنی سەربازانی زیاتر بۆ سووریا و بەربڵاوبوونەوەی چالاكییە سەربازییەكانی ئەو وڵاتە كە بە گوتەی ژەنەڕاڵ ریمۆند مەك مەستەر، راوێژكاری ئاسایشی نەتەوەیی ئەمەریكا، لە بەرنامەی كاری دەوڵەتی ترامپدایە، مەترسی شەڕی راستەوخۆی یەكە ئەمەریكاییەكانی لەگەڵ هێزەكانی ئێران و رووسی لایەنگری ئەسەد زیاتر كردووە.
روسیا لە كاردانەوەی بە خستنەخوارەوەی سۆخۆی-22ی سووریا لەلایەن ئەمەریكا دوای ئیدانەكردنی ئەم هەنگاوەی ئەمەریكا رایگەاند هاوكاری لەگەڵ ئەمەریكا لە چوارچێوەی لێكتێگەیشتنی ئاسایشی فڕینی فڕۆكە سەربازییەكان هەڵدەپەسێرێت و فڕۆكە ئەمەریكاییەكان و باقی وڵاتانی هاوپەیمانی لە رۆژئاوای فوڕات دەكاتە ئامانج.

 

هێرشی موشەكی كۆماری ئیسلامی بۆ سووریا
مەترسی شەڕ لەگەڵ ئێران بە لەبەرچاوگرتنی چالاكی بێپێشینەی كۆماری ئیسلامی ئەویش بە هێرشی چەند موشەك بۆ سووریا رواڵەتێكی جدییتری بە خۆیەوە گرتووە. سوپای پاسداران لە دوایین كاتەكانی رۆژی یەكشەممە 23ی حوزەیران شەش موشەكی نێوەندبڕی زەمین بە زەمینی لە پارێزگاكانی كرماشان و كوردستانەوە بەرەوە پێگەكانی داعش لە دەیرئەلزووری سووریا تەقاندەوە. ئەم هێرشە موشەكییە، بە گوتەی سوپای پاسداران، كاردنەوەیەك بوو بەرامبەر هێرشی تیرۆریستی داعش بۆ پەرلەمان و گۆڕی خومەینی. ئەمە لە كاتێكدایە سوپا دەیتوانێت بە شێوەگەلێكی جیاواز كە ئەونە نمایشی نەبێت لە داعش بكاتەوە. هەر نەبێت كۆماری ئیسلامی و سوپا هاوپەیمانگەلێكی زۆریان لە وڵاتی سووریا و لوبناندا هەیه. هێرشی موشەكی ئەویش لە نێو ئێرانەوە بۆ سووریا بە مەبەستی تۆڵەسەندنەوە، جگە لە خۆراكی ناوخۆ و پیشاندانی دەسەڵات و رازیكردنی خەڵك دوای هێرشی تیرۆریستی داعش، پەیامێكی بۆ ئیدارەی ترامپ و عەرەبستانی سعوودی تێدابووە، ئەو خاڵەی سەرتیپ رەمەزان شەریف، وتەبێژی سوپای پاسداران، بە شێوەی لاوەكی جەختی لەسەر كرەوە. ئەو گوتی: "با پشتوانانی نێوەدەوڵەتی و ناوچەیی تیرۆریستان درك بە پەیامی هۆشداریی ئەم ئۆپەراسیۆنە موشەكییە بكەن." ئەو موشەكانەی لە هێرشی موشەكی بۆ سووریا، ئێران كەڵكی لێوەرگرتوون 700 كیلۆمەتر مەدوا دەبڕن و هەر ئەمە دەتوانێت زۆربەی شارە گەورەكان و شوێنە هەستیارەكانی سعودیە بكاتە ئامانجی خۆی. لە مانگەكانی رابردوودا عەرەبستانی سعوودی پڕوپاگەندەی دژی كۆماری ئیسلامی زیاتر كردووە و گەشتی دۆناڵد ترامپ بۆ عەرەبستان و قسەكانی دەربارەی پشتوانی بێ مەرج لە ریاز ئەوەندەی دیكە ئاگرەكەی خۆشكرد. هاوتەریب لەگەڵ ئەمە، حەزی ترامپ بۆ كەڵك وەرگرتن لە هێزی سەربازی دژی بەشار ئەسەد و پشتیوانانی دەتوانێت لایەنێكی دیكە بەشەڕی ناوخۆی سووریا زیاد بكات و دەستی بۆ بوونی سەربازی لە ناوچە كە بە "شكستی داعش لە عێراق و سووریا" مانای كردبوو ئاواڵاتر بكات. پردی پێوەندی وشكانی تاران- بەغدا- دیمشق- لوبنان لە روانگەی ئیدارەی ترامپەوە، كۆماری ئیسلامی گەورەترین هەڕەشە. هەرچەند ترامپ هەندێ لە بەڵێنەكانی لە میانەی بانگەشەی هەڵبژاردن دوای رۆیشتنی بۆ كۆشكی سپی هێمنتر كرد بەڵام دەربارەی كۆماری ئیسلامی رای نەگۆڕیوە. بە بڕوای ئەو كۆماری ئیسلامی گرنگترین پشتیوانی تیرۆیستە لە جیهاندا و گەورەترین هەڕەشە بۆ سەر قازانجەكانی ئەمەریكا لە رۆژهەڵاتی ناوەڕاستدا. ئەو لە ناو تیمەكەی كەسانی وەكوو ژەنەڕاڵ ماتیس، وەزیری بەرگری و ژەنەڕاڵ مەك مەستەر، راوێژكاری ئاسایشی نەتەوەیی، هەیە كە داواكاران بە شێوەیەكی دیكە بەر بە دەستێوەردانەكانی ئێران لە ناوچەكە بگرن. بەربڵاوی دەسەڵات و بوونی سەربازی كۆماری ئیسلامی لە سووریا بە بەراورد بە عێراق زۆر زیاترە، كۆماری ئیسلامی لە سەرەتای شەڕی ناوخۆی سووریا تا ئێستا بە میلیاردەها دۆلار یارمەتی رژێمی ئەسەدی داوە و هەزاران كەس لە ئەندامانی سوپا و خۆبەخشەكانی شیعەی بە تایبەتی ئەفغانی و عێراقی بۆ شەڕی سووریا رەوانە كردووە. لە دوو ساڵی رابردوودا، رووسیا و ئێران بە هاوڕێیی حیزبوڵڵای لوبنان و میلیشا نێردراوەكانی عێراق بۆ سووریا، لە وەرگرتنەوەی ناوچەكانی ژێر دەسەڵاتی جیهادگەراكان و گروپە جیاوازەكان یارمەتی رژێمی ئەسەدیان داوە. لە ساڵی رابردووەوە هێزەكانی ئەسەد بە یارمەتی بۆمبارانە بەربڵاوەكەی هێزی ئاسمانی رووسیا دژی پێگەی گروپە جیاوازەكان و پشتوانی بەربڵاوی هێزەكانی كۆماری ئیسلامی لەسەر وشكانی، بەشگەلێكی زۆری لە حەڵەب لە گروپە جیاوازەكان وەرگرتەوە كە بە گەورەترین سەركەوتنی سەربازی ئەسەد لە سەرەتای شەڕەی ناوخۆی سووریاوە ئەژمار دەكرێت.

 

ئامانجی دواتری رژێمی ئەسەد و كۆماری ئیسلامی و رووسیا پارێزگای دیرئەلزور لە رۆژهەڵاتی سووریا كە چاڵە نەوتەكانی ئەو وڵاتە لەو ناوچەیە. دیمشق زۆربەی ناوچەكانی ئەو پارێزگای لە مانگەكانی كۆتایی ساڵی 2013 لەدەستدا بەڵام هێشتا كۆنتڕۆڵی بەشگەلێكی لە شاری دیرئەلزور ناوەندی ئەو پارێزگایە بە دەستەوە ماوە. بەم شتانەی كە باسكرا هێشتا شاری دەیرئەلزوری بە 200 هەزار دانیشتوووە لەلایەن داعشەوە ئابڵووقە دراوە. ئەم پارێزگا ستراتیژیكە چەندین رێڕەوی سنووری نێوان سووریا، عێراق و ئەردەن هەیە و یەكێك لە سەرەكیترین رێگاكانی پێوەندی نێوان دیمشق و بەغدا لەم پارێزگاوە تێدەپەڕێت. هەر بەم هۆكارە لە حەفتەكانی رابردوودا هێزەكانی ئەسەد بە یارمەتی حیزبووڵا و باقی گروپە شیعەكان سەرنجیان بۆ لای ئەم پارێزگایە راكێشاوە تا بە سەقامگیركردنی پێگەی خۆیان لەم ناوچە، لە نێوان خۆیان و ملیشا شیعەكانی سەربە ئێران لە عێراق كە لەو بەرەی سنوور شەڕی داعش دەكەن، پێوەندییەك دروست بكەن. یەكێك لە ئامانجە سەرەكییەكانی ئەم پێوەندییە، دامەزراندنی پردێكی پێوەندی تاران- بەغدا- دیمشق- حیزبوڵڵای لوبنانە كە كۆماری ئیسلامی بە هەموو توانییە بۆ ئەم ئامانجە تێدكۆشێت. كۆماری ئیسلامی بە دامەزراندنی ئەم پردی پێوەندییە دەتوانێت تومانی خۆی لە زەمینەی دەسەڵات و پشتیوانی لۆجستیكی لە ناوچەكە زیاتر بكات. ئێستا تاران پشتی بە رێگەی ئاسمانی و زەریایی بەستەوە كە زۆر باش نییە. رێگەی زەریایی دەتوانێت بەرامبەر رێگرییەكانی هێزەكانی ئیسڕائیل هەڕەشەی بكەوێتە سەر و رێگەی ئاسمانیش لە ئەندازە ئاڵوگۆڕ و شاردنەوەی فڕۆینەكان رێگریی تایبەتی لەبەردەمه. هەربۆیە ئەم پردە وشكانییە توانای كۆمارپی ئیسلامی لە زەمینەی پشتیوانی و ئاڵوگۆڕی بە رێژەیەكی زۆر زیاتر دەكات و راستەوخۆ ئێران بە زەریای سپیەوە گرێ دەدات. دامەزراندنی ئەم كریدۆرە كە ناوی "هیلالی شیعە"ی لێنراوە و کە حیزبوڵڵا واتە بەهێزترین هێزی سەربازی و سیاسی لوبنانیش لە خۆی دەگرێت، یەكێك لە نیگەرانە سەرەكییەكانی ئەمەریكا، ئیسڕائیل و وڵاتانی عەرەبی بە تایبەتی عەرەبستانی سعوودیە. هەر بۆیە ئیدارەی دۆناڵد ترامپ، بە پێچەوانەی ئیدارەی پێشووی ئەمەریكا، هاوتەریب لەگەڵ پشتوانی ئاشكرا لە عەرەبستانی سعوودی و باقی وڵاتانی عەرەبی ناوچەكە، بە توندی دژی ئێران هەڵوێست وەردەگرێت. ئەم گۆڕینی هەڵوێستەی ترامپ لە سەردانی مانگی رابردوویدا بۆ ریاز كە یەكەمین سەردانی بوو بۆ رۆژهەڵاتی ناوەڕاست، پیشاندرا. ترامپ هاوڕا لەگەڵ بەرپرسانی سعوودی، سەركێشییەكانی كۆماری ئیسلامی و گروپە ئیسلامگەرا توندڕەوەكانی بە سەرچاوەی كێشەكانی رۆژهەڵاتی ناوەڕاست وێنا كرد بێ ئەوەی ئاماژە بە رۆڵی عەرەبستان لە ناسەقامگیركردنی یەمەن و پەرەدانی بە شەڕی ناوخۆ لەو وڵاتە بدات. هەڵپەساردنی پێوەندییەكان لەگەڵ قەتەڕ و ئابڵووقەدانی ئەو وڵاتەش دوایین هەنگاوی عەرەبستانە لە ناسەقامگیركردنی ناوچەكە. لەم نێوانەدا، بەرپرسانی كۆماری ئیسلامی دژایەتییەكانی بەردەوامی ترامپ بۆ رێكەوتنە ئەتۆمییەكە كە بووە هۆی هەڵوەشاندنەوەی ئابڵۆقە نێودەوڵەتییەكان، لە رێكەوتنەكە دڵساردیانی كردۆتەوە. وتارەكەی ترامپ لە ریاز كە ئێرانی بە سەرچاوەی شەڕی تایفی و تیرۆر لە ناوچەكە تۆمەتبار كرد ئەوەندی دیكە دڵساردیانی كردەوە. ئەم كارە لەگەڵ سەپاندنی ئابڵووقەی زیاتر بەسەر ئێراندا و یارمەتی دژەكانی كۆماری ئیسلامی بۆ گۆڕینی رژێم، رەخنەی توندی كاربەردەستانی كۆماری ئیسلامی بە دوای خۆیدا هێنا بە جۆرێك خامەنەیی، رێبەری كۆماری ئیسلامی گوتی لە فشە فشەەكانی ترامپە چەقۆكێشی تازەهاتووی بێئەزموون مەترسن، لە دەمی دەدەین و لووتی دەشكێنین.
هەڵكشانی مەترسییەكانی دۆخەكە وادیارە ئەمەریكا بە دانانی هەموو هێلكەكانی لە سەبەتەیەك و پشتوانی بەربڵاو لە هاوپەیمانەكانی شەڕی ناوخۆی سووریا زیاتر ئاڵۆز كردووە. ئیدارەی ئۆباما زیاتر بیری لە كۆنتڕۆڵكردنی داعش دەكردەوە و گرنگی بە رژێمی ئەسەد نەدەدا و داوای هاوپەیمانەكانی ئەمەریكا لە ناوچەكە دەكرد خۆیان لە شەڕ و شۆڕ بە درووبگرن. بەڵام ئەمڕۆ ئیدارەی ترامپ، بە وەلانانی دكترینی ئۆباما، دژی پاوانخوازییەكانی كۆماری ئیسلامی لە ناوچەكە و رژێمی ئەسەد وەستاوەتەوە. هەروەها ترامپ پشتگیری لە پلانی پێنتاگۆن، سەرەڕای ناڕەزایەتییەكانی توركیا، بۆ پشتیوانی لە كوردەكانی سووریا دەربڕی. لە مانگی ئایاری ئەمساڵدا، لە پشتوانی لە پلانی ناوبراو، ئیدارەی ترامپ چەكی قورسی بۆ هێزەكانی دیموكراتیكی سووریا نارد تا لە ئۆپەراسیۆنی ئازادكردنی رەققە بەكاری بهێنن. ئەم كارەی ئیدارەی ترامپ، توركیا و رووبەڕووی كوردانی سووریا كردەوە. توركیا پێوایە یەپەگە بەشێكە لە پارتی كرێكارانی كوردستان (پەكەكە). لە كاتێكدا پێنتاگۆن چەكداركردنی هێزەكانی دیموكراتیك بە سەرۆكایەتی یەپەگە بە هەنگاوێكی بەرگریكارانە وێنا دەكات، رژێمی ئەسەد و كۆماری ئیسلامی بە هەنگاوی هێرشبەرانەی ناودەبەن و دەڵێن ئەمەریكا فڕۆكەی سوپای سووریا لە ئاسمانی ئەو وڵاتە خستۆتە خوارەوە. هاوكات یارمەتی كۆماری ئیسلامی بە هێزەكانی سووریا بۆ كۆنتڕۆڵكردنەوە پارێزگای دەیرئەلزور لەلایەن داعش و هەوڵدان بۆ دامەزراندنی پردی پێوەندی تاران تا لوبنان، بەرەو ئاراستەیەك دەڕوات كە كێشەی نێوان سوپای پاسداران و توندڕەوەكانی كۆماری ئیسلامی لەگەڵ ئیدارەی ترامپ زیاتر بكات و شەڕ لە رۆژهەڵات و باشووری سووریا رووبدات.
دامەزراندنی پردی پێوەندی ناوبراو نە تەنیا شكست بە پلانی ئیدارەی ترامپ بۆ تێكشكانی سەربازی داعش لە سووریا دەهێنێت لە درێژمەودایشدا پێگەی كۆماری ئیسلامی لە سووریا سەقامگیرتر دەكات و لەسەر ئامانجی سیاسی ئەمەریكا بۆ چارەسەری قەیرانی سووریاش جێپەنجەی خراپ دادەنێت، هەرچەند تا ئێستا ئیدارەی ترامپ سیاسەتێكی تۆكمەی بۆ سووریای دوای تێكشكانی سەربازی داعش رانەگەیاندووە. لەمبارەوە ژەنەڕاڵ دانفۆرد، سەرۆكی فەرماندەیی سوپای ئەمەریكا، گوتوویەتی: "[سەركەوتن] لە مووسڵ تاكتیكییە، لە رەققە تاكتیكی دەبێت. ئێمە نابێت ئەم سەركەوتنانە بە كۆتایی شەڕ لە داعش بزانین. ئێمە دەبێت خۆمان بۆ شەڕێكی درێژخایەن ئامادە بكەین." لەم نێوانەدا یەكێك لە مەترسییەكان بە پێی رەفتارەكانی كۆماری ئیسلامی و سووریا لە رابردوودا ئەوەیە هەوڵبدەن دانبەخۆداگرتن و ئیرادەی ئەمەریكا هەڵبسەنگێنن. ئەم كارە بە لەبەرچاوگرتنی رەفتار و هەڵسوكەوتی ترامپ بەرامبەر ئەم دوو رژێمە دەتوانێت ببێت بە شەڕێكی كە لە كۆنتڕۆڵ دەردەچێت.

 

سەرچاوە: سایتی رادیۆ فەردا

وەرگێڕان : خۆر نیوز 

 

بابەتی زیاتر