کوردستان مەکتەبی سیاسیی پارتی و یەکێتی کۆبوونەوە

مەکتەبی سیاسیی پارتی و یەکێتی کۆبوونەوە

 

مەلا بەختیار: لەگەڵ پارتی بنەماکانی ئەم ئەزموونە دەپارێزین

 

 

لێپرسراوی دەستەی کارگێڕیی مەکتەبی سیاسیی یەکێتیی نیشتمانیی کوردستان رایدەگەیەنێت، کە حزبەکەی لەگەڵ پارتی دیموکراتی کوردستان ”بنەماکانی ئەم ئەزموونە“، دەپارێزن.

رۆژی یەکشەممە 7/1/2018، شاندی مەکتەبی سیاسیی پارتی و یەکێتی لە بارەگای مەکتەبی سیاسیی یەکێتی لە سلێمانی، کۆبوونەوە و دوای کۆبوونەوەکەش، نێچیرڤان بارزانی، جێگری سەرۆکی پارتی و مەلا بەختیار، لێپرسراوی دەستەی کارگێڕیی مەکتەبی سیاسیی یەکێتی پرێس کۆنفرانسێکیان ئەنجام دا.

مەلا بەختیار رایگەیاند، پارتی و یەکێتی سەرەڕای رەخنە و تێبینییەکانیان لەسەر یەکتر، بەڵام ئەرکی هاوبەشیان هەیە و ”پرۆسەیەکی زۆر“یش، کە ئەرکی ئەو دوو حزبەیە، ماوە جێبەجێ بکرێت.

لێپرسراوی دەستەی کارگێڕیی مەکتەبی سیاسیی یەکێتی لەبارەی پەیوەندییەکانی هەولێر و بەغدا رایگەیاند، خەریکە ”دەرگا“ی پرۆسەی دیالۆگ و دانوستاندن دەکرێتەوە و هەرێمی کوردستانیش پابەندە بە چارەسەرکردنی کێشەکانی لەگەڵ عێراق لەچوارچێوەی دەستووری هەمیشەیی عێراق.

مەلا بەختیار بە ئاماژەکردن بە رۆڵی کاریگەری هەردوو حزب لە رووخاندنی رژێمی سەدام حوسێن و دامەزراندنی حکوومەتی عێراق دوای رووخاندنی بەعس، رایگەیاند، ئەگەر کەموکوڕی و کێشەش هەبێ، نە دەبوو حکوومەتی عێراق ”بەم غروور و هێزە سەربازییەوە“ هێرش بکاتە سەر کوردستان و لە 16ـی ئۆکتۆبەر، کەرکووک داگیر بکات.

لێپرسراوی دەستەی کارگێڕیی مەکتەبی سیاسیی یەکێتی باسی ئامادەکارییەکان بۆ هەڵبژاردنی پەرلەمانی کوردستان و عێراقی کرد و رایگەیاند، لە کۆبوونەوەکەیاندا، هەردوو ”بە گرنگمان زانی“ یەک هەڵوێست بن.

مەلا بەختیار هەروەها رایگەیاند، کە ئامادەیی حکوومەتی هەرێمی کوردستان بۆ دەست پێ کردنەوەی گفتوگۆکان لەگەڵ حکوومەتی عێراق ”هەنگاوی دڵخۆشکەرن“ و ئێستاش قسە لەسەر کردنەوەی فڕۆکەخانەکانی کوردستان دەکرێت.

ئەو سەرکردەیەی یەکێتی جەختی لەوە کردەوە، کە حزبەکەی و پارتی ”بنەماکان“ی ئەزموونی هەرێمی کوردستان دەپارێزن و لەکاتی تەنگانەدا، ”خوێن بۆ کوردستان دەبەخشن“.

مەلا بەختیار رەخنەی لەو حزب و لایەنانەش گرت، کە داوای چاکسازیی لە حکوومەت دەکەن و لە میدیاکانیشەوە ”هەموو شتێک“ بەرامبەر حکوومەت دەکەن و رایگەیاند، لەگەڵ پارتی ”دەرگایەکی نوێ“یان کردووەتەوە بۆ گەیشتنە چارەسەرێک بۆ کێشە ئابوورییەکانی کوردستان.

لێپرسراوی دەستەی کارگێڕیی مەکتەبی سیاسیی یەکێتی لەبارەی چوونی شاندی بزووتنەوەی گۆڕان، کۆمەڵی ئیسلامی و هاوپەیمانی بۆ دیموکراسی و دادپەروەری بۆ بەغدا و کۆبوونەوەیان لەگەڵ بەرپرسە عێراقییەکان، رایگەیاند، ئەوان ”بەبێ راوێژ لەگەڵ حکوومەت و پەرلەمان“ چوونەتە بەغدا و لە گەڕانەوەشیاندا، وردەکارییەکانی کۆبوونەوەکەیان ئاشکرا نەکردووە.

مەلا بەختیار هەروەها رایگەیاند، کە لە کۆبوونەوەکەیاندا، بڕیاریان داوە رۆژی دووشەممە 8/1/2018 کۆبوونەوەیەکی هاوبەشی مەڵبەندی یەکێتی و لقی پارتی لە کەرکووک لەگەڵ ئەنجومەنی پارێزگای کەرکووک ساز بکرێ، کە تێیدا تاوتوێی ”دۆخی نالەبار“ی کەرکووک بکرێ و بڕیار لەبارەی ئاوارەکانەوە بدرێت.

ئەو سەرکردەیەی یەکێتی ئاماژەی بە رێککەوتنی ستراتیژیی حزبەکەی لەگەڵ پارتی کرد، کە لە ساڵی 2005 لە نێوان سەرۆک مەسعود بارزانی، سەرۆکی پارتی و جەلال تاڵەبانی، سکرتێری کۆچکردووی یەکێتی واژۆ کرا و رایگەیاند، ئەو رێککەوتنە دەستکەوتی گەورەی بۆ گەلی کوردستان هەبوو و ئێستاش هەردوو حزب بیر لە رێککەوتنێکی نوێ دەکەنەوە.

 

بابەتی زیاتر